Os Correspondentes Xuvenís do CIFP A Farixa participan no encontro Xuventude na Onda 2026
O xoves, 12 de novembro, os Correspondentes Xuvenís e o voluntariado do CIFP A Farixa asistiron en Santiago de Compostela á décima edición de Xuventude na Onda, o encontro anual do programa Xuventude Mentoring da Dirección Xeral de Xuventude.
A Xunta de Galicia facilitou o transporte e o grupo viaxou xunto cos correspondentes xuvenís do CIFP Portovello.
Ao longo da xornada, o alumnado asistiu a mesas sobre os perfís laborais máis demandados polas empresas e sobre o impacto da intelixencia artificial no mercado laboral, e conversou con mentores e relatores durante o xantar.
Nos espazos da Xunta coñeceu servizos como Quérote+, Xeración Emprende, SEXSAN ou Mocidade polo Clima, e participou en actividades de realidade virtual, pilotaxe de drons, serigrafía e xogos de sensibilización contra a violencia de xénero. Tamén houbo tempo para desfrutar dun concerto de 9Louro e unha sesión amenizada polo DJ Alex.
Alén do aprendido, a xornada deixa un resultado concreto: o contacto co CIFP Portovello abriu a porta a proxectos e colaboracións entre os dous centros, que se irán concretando nos vindeiros meses.
Correspondentes Xuvenís é un programa de Xuventude de Galicia que vén impulsado desde a biblioteca no noso centro. A participación no encontro enmárcase no seu programa de voluntariado, Bibliotecas Escolares Solidarias. A crónica completa, con fotos, pode lerse no blog da biblioteca.
_________________________________________________________________________________________________________________________________
Actividades-2026-27/correspondentes-xuvenis
Actividades-2026-27/correspondentes-xuvenis