Presentación do libro "Amores que dejan huella" de Ángel Otero

Hoxe, 2 de abril, celébrase o Día do Libro Infantil e Xuvenil, en conmemoración do día no que naceu o autor Hans Christian Andersen, famoso por "A pequena serea" e outros moitos contos infantís. E que mellor maneira de festexalo que acollendo a presentación de "Amores que dejan huella", un libro escrito por Ángel Otero, alumno do Ciclo Medio de Instalacións de Telecomunicacións do CIFP A Farixa de Ourense de tan só 17 anos e que publicou o seu libro cando tiña só 16!

Durante a presentación, Ángel compartiu con nós que adoitaba ser mal estudante e que incluso algún profesor lle chegara a dicir que non valía para escribir, o que nun principio o desanimou. Por sorte, durante a ESO atopou unha profesora de Lengua que lle soubo motivar e lle deu folgos para escribir. Hoxe Ángel séntese orgulloso de ter completado o seu libro, destacando o moito traballo que lle levou. Se ben agora mesmo non está a escribir debido á falta de tempo e ás demandas dos seus estudos, afirmou que non descarta retomar a escritura no futuro. Ao evento acudiron estudantes, profesores e persoal de servizos.

Todos/as pasamos un momento moi ameno e entretido. Agradecemos profundamente a Ángel a súa participación e aproveitamos para comunicarvos que "Amores que dejan huella" xa está dispoñible para o préstamo na nosa biblioteca!